Sizni 8-dekabr – O‘zbekiston Respublikasi Konstitutsiyasi kuni bilan chin qalbimdan samimiy muborakbod etaman.

O‘zbekistonda, xususan, Surxondaryoda ta'lim tizimining rivojlanishi, sohadagi islohotlarning jadal sur'atlarda olib borilishida Konstitutsiyamizning ahamiyati juda muhim ekanligini yaxshi bilamiz.

Bosh qomusimiz bizga pedagog maqomini mustahkamlash, farzandlarimizni bilimli va barkamol avlod qilib tarbiyalash, ularni shu yurt koriga yaraydigan mustaqil shaxs qilib kamolga yetkazish borasidagi kasbiy faoliyatimizda mustahkam huquqiy tayanch bo‘lib xizmat qiladi.

Qadrli ustozlarimiz bosh qomusimizda belgilangan huquq va majburiyatlarimizni o‘quvchilar o‘rtasida keng targ‘ib etish, o‘g‘il-qizlarning huquqiy savodxonligini oshirish hamda qonun ustuvorligi ta'minlangan adolatli jamiyat qurishda jonbozlik ko‘rsatishlariga ishonaman.

Siz, azizlarni Konstitutsiya kuni bilan yana bir bor chin dildan qutlab, barchangizga sihat-salomatlik, xonadonlaringizga tinchlik-xotirjamlik, fayz-u baraka tilayman.