Кыргыз Поэзиясы

#Бактыгүл_КӨКӨТАЕВА

ЖӨН ГАНА ОЙЛОЮНЧУ СИЗ ЖӨНҮНДӨ

Жамгырды бир үн коштойт өкүнүчтүү,
Жаңы эле сен тараптан келдим эле.
Жакыным дей албаймын жаздан тапкан,
Жөн гана ойлоюнчу сиз жөнүндө.

Жаштыгым жерип турат жөтөлүмдү,
Жашоом да жакпай турат өз көзумө.
Жамгырда жанчылганды жакшы көрөм,
Жөн гана ойлоюнчу сиз жөнүндө.

Байпасам сизге жазган ырларымды,
Баары бир бир үн коштойт өкүнүчтүү.
Жабылуу бойдон калсын жабыгуулар,
Жөн гана ойлоюнчу сиз жөнүндө.

Жакама сээп алып жыпарлардан,
Жасанып барып жүрөм бул күндөрдө.
Жактырды дебеңизчи буларымды,
Жөн гана ойлоюнчу сиз жөнүндө.

Шурудай сууну тизип кирпигиме,
Сулуулап койгон азыр түн да мени.
Суу тийген көздөрүмдү элестетип,
Жөн гана сиз да мага келиңизчи.

Алып кет бул ырымды эстелик деп,
Айтып бар мен жөнундө ардагыңа.
Суктанып койбостугуң билип туруп,
Суу болуп баргым келди алдыңызга.

Ак дилимден арналып төгүлөрдө,
Арманымдан үн келет бөлөк деген.
Асылымдын бардыгын сизге жаккан,
Ардагыңа жөнөтөм жамгыр менен.
Жалгыз ыйлап келаттым үйдү көздөй,
Жамгыр турду артымда бөлөк деген,
Жамгыр турду артымда көнөктөгөн...


____________________

👉 "КЫСКА-НУСКА"

🖌️ Авторлор

🙏 Колдоо көрсөтүү

#Шабдан_СУЛАЙМАНОВ

КЫШ БАРАКТАРЫ

Көөдөн бош, эмнегедир чөгөт көңүл,
Көчөнүн аяк-башын токуп туман.
Кар төгөт, кабыргамды сөгөт менин,
Качанкы ырларымды окуп турам.

Эриктим, эч силерди көрө албадым,
Эскирген эсил сөздөр түк кетпеди.
Дүйнөнүн чындыгына көнө албадым,
Дүмүрдү тургузууга күч жетпеди.

Сагынчым айтып келип кеп түгөндү,
Санаанын сан жылдызы жанып көктөн.
Эх күндөр! Силер дагы кеттиңерби,
Эси жок бирөөгө окшоп чанып кеткен.

Тойдум мен тогоосу жок калыстыкка,
Томуктай жер үстүндө жоктой кызык.
Аттигиң алыс, алыс, алыстыкка,
Атылып кетким келет октой сызып.

Тымтырстык... Тынч бөлмөдө оюм сынат,
Тышта кар ачып жатат кыш барагын.
Аргасыз пенделикке моюн сунам,
Аңгырап боштук ээлейт туш тарабым.

Бийледик бийик күйгөн жалындарга,
Бир болдук, кайра бирден ыдырадык.
Эми биз кайсыл тоонун жалын кармап,
Эми биз кай талааны кыдырабыз.

Кайрылып келүүчүдөй кайра баары,
Караймын бир чекитин аста шыптын.
Мезгилдин арабасын айдап алып,
Мен бүгүн өзүмө-өзүм касташыпмын.

Жаштыктан, жакшылыктан элес берип,
Жарыгын жанып турган кечки Бишкек.
Калтырып бизди кошкон элет жерин,
Калаадан бактыбызды кеттик издеп.

Узадык үн жетпеген чакырымдай,
Учушту асыл жылдар закым болуп.
Жашоону өтөп келем акырын, жай,
Жалгыздык досумдан да жакын болуп.

Кезикпей, алыстадың кача бердиң,
Кезишпейт биздин жолдор бөлөк жолдой.
Кыялга жетеленип баса бердиң,
Кыйналып турган чакта жөлөк болбой.

Чачылдым чамам жетпей жыйнаганга,
Чакырдым жакындарым келишпеди.
Суроолор сулуулардай ыйлаганда,
Суу перим сени күттүм деңиздеги.

Туюктук... Мыкчып турам башты мына,
Турмуштан жок издепмин, бар издебей.
Тумчугуп туман баскан жаштыгыма,
Туулгум келди кайра наристедей.

Убакыт айланганда күчтөй басып,
Унуттум бүтүн баарын деймин дагы.
Түшүнүп бүгүнкүнү бүтпөй жатып,
Түйшүгүн эртеңкинин жеймин жаңы.

Үшкүрүк бүткөн бойду тушап кетип,
Үшүгөн жолду тиктейм бар кабардай.
Биз күздө каркырадай узап кетип,
Биз кышты тоскон жокпуз каргалардай.

Чындыкты түтүн сымак үйлөп коюп,
Чылымга мүнөт сайын ышталамын.
Күн кыска. Кар чатырда үймөк болуп,
Күүгүмдө ачып жатат кыш барагын...


____________________

👉 "КЫСКА-НУСКА"

🖌️ Авторлор

🙏 Колдоо көрсөтүү

Кыргыз Республикасынын Улуттук жазуучулар союзу дагы эки адабий сыйлыкка чыгармаларды кабыл алуу башталганын билдирди:

Алыкул Осмонов атындагы адабий сыйлык

Тоголок Молдо атындагы адабий сыйлык

#сынак


____________________

👉 "КЫСКА-НУСКА"

🖌️ Авторлор

🙏 Колдоо көрсөтүү

#Абдысамат_САРАЛА

*  *  *

Ньютондун чокусуна кулаган
алма себеп бүт дүйнөлүк тартылуу
мыйзамынын чыгышына. Улаган
болсок ойду бул логика аркылуу –

Шедевр ырлар жана ыргактар
жазылчудай октябрда... Күзүндө...
Далай акын төбөсүнө жаңгактар
түшсө керек эмендерден үзүлгөн.

О? октябрь... Көчөлөрүн Бишкектин
эмен жаңгактары менен ургулап,
адамдарга тынчтык бербей, иштеткиң
келеби – "Тургула эле, тургула"

- деп, жар салып кыштын келе жатканын.
А биз адамдар мүнөт сайын чоктой сууп
бара жаткан күзгү күнгө кактанып
тургубуз бар, ансыз деле кышкы суук

каалгасын коңур күздүн булкуду.
(Көңүл бурбай этикетке, манерага)
Аздан соң аптап жана биз кудум
болобуз Париж жана фанерадай…


____________________

👉 "КЫСКА-НУСКА"

🖌️ Авторлор

🙏 Колдоо көрсөтүү