Уйгулаах Ас

Сүбүөкүлэ - быар, сүрэх, ис-үөс көмөлөһөөччүтэ

Билигин ордук аһаабыппытын ыраастана сатыыр кэммит, онуоха сүбүөкүлэбитин туһаныаххайыҥ 😍

Сүбүөкүлэ курдук баай састааптаах оҕуруот аһа наһаа элбэҕэ суох.
Кини састаабыгар элбэх бетаин, фолиевай кислота, B битэмиин арааһа, бета-каротин, С битэмиин баар. Ону таһынан микроэлеменнар — калий, магний, железо, кремний, фосфор, натрий, цинк, бор уонна йод кытта баар уо.д.а.
Киниэхэ баар бетаин (триметилглицин) эттигэ күүстээх тэтэркэй дьүһүнүн биэрэр, 100 гр сүбүөкүлэҕэ ~128 мкг бетаин, ~ 1,4 мкг железо баарын быһаарбыттар. Ол иһин сүбүөкүлэни сиэтэхпитинэ хааммыт састааба, эргиирэ тупсар, анемияҕа көмөлөөх.

Сүбүөкүлэ туһата:
• Быар үлэтин тупсарар, токсиннары, шлактары таһаарар, хааммытын ыраастыыр. Ол түмүгэр өссө тириибит тупсар, ыраастанар, сымныыр, сирэйбит-харахпыт сырдыыр. Өссө киниэхэ баар антиоксиданнар сэбэрэбитин эмиэ тупсарар дьайыылаахтар, онон эдэр, кэрэ буолар аспыт ахсааныгар киирэр;
• Сүрэх ыарыыларын профилактикатыгар олус үчүгэй, сосудтары бөҕөргөтөр, ыраастыыр, кэҥэтэр, хаан эргиирин тупсарар, ол түмүгэр хаан баттааһынын түһэрэр, онон гипотониктар наһаа үлүһүйбэккэ сиэхтээхтэр, харахпыт көрөрүн тупсарар, өйдүүр дьоҕурбутун күүһүрдэр (память), холестерины түһэрэр;
• Састаабыгар пектин уонна элбэх клетчатка баар буолан оһоҕос үлэтин, микрофлорабытын тупсарар, оһоҕоско "хаайтарыыны" суох гынар;
• Кэрэ аҥардарга ыйдааҕы кэлэрин бэрээдэктиир, гормоннары сааһылыырга көмөлөһөр;
• Кремнийдаах буолан кальций иҥэмтиэтин күүһүрдэр, ол иһин үчүгэй сыыры, иэдьэгэйи кытта сиир тоҕоостоох;
• Күүстээх өй үлэтигэр сылдьар, спордунан дьарыктанар дьоҥҥо күүс-сэниэ киллэрэр, былчыҥ ыйааһынын кытта эбэр, былчыҥмытын харыстыыр;
• Противовируснай дьайыылаах, үчүгэй профилактика буолар.

Ото (ботвата) эмиэ туһалааҕын умнумуоҕуҥ. Манна хас да рецебы таһаарбытым. Онон сүбүөкүлэни сөбүлүүр буоллахпытына сии сатыаххайыҥ. Бэйэтинэн эбэтэр араас салааттары оҥостон: яблоканы, грушаны, гранаты, араас эриэхэлэри, сиэмэлэри - грецкэй эриэхэни, тыква сиэмэтин, кунжуту кытта; сөбүгэр амтаннаах оҕуруот астарын эбэн - чесногу, луугу; атын оҕуруот астарын - моркуобу, буспут хортуосканы, хаппыыстаны кытта, винегрет наһаа үчүгэй буолааччы дии; отоннору - уулаах отону, хаптаҕаһы эбэн; күөх үүнээйилэри - укроп, петрушка, сельдерей уо.д.а туһалаах астары эбиликтээн. Итинтэн кини араас дьайыыта өссө күүһүрэн биэрэр.

Сүбүөкүлэ амтана минньигэс буолан кыра оҕолор эмиэ сөбүлээн сииллэр.

Биир интэриэһинэйэ - сүбүөкүлэ өр даҕаны бустаҕына састааба улаханнык уларыйбат диэн быһаарбыттар. Онон биһиги кинини харгыһа суох ууга, паарга, духовкаҕа төһө баҕарар буһарыахпытын сөп. Буспут уутун испэт ордук, тоҕо диэтэр нитрата мустар дииллэр. Сиикэйдии сүмэһиниттэн утах оҥостон эмиэ тута испэттэр, хайаан даҕаны туруора түһэн эбэтэр хоннорон баран кыраттан саҕалаан иһэллэр, ол эмтэнэр рецептарга чопчу суруллар.

Онтон эһиги сүбүөкүлэттэн ханнык сөбүлүүр салааттааххытый, арыы кутаҕыт дуу, сүөгэй эбэтэр майонез дуу? Суруйаарыҥ 😋 ↩️

Үтүө киэһэнэн!

Сүһүөх эмтэрэ наһаа күүстээх эмтэр буолаллар, өр иһиллибэттэр, элбэх харгыстаахтар. Онтон бу туох даҕаны эмэ суох эмтэнэн көрөргө, боруобалыырга үчүгэй ньыма дии саныыбын, сүрүнэ диэн бэйэ үүннэриллибит удобрениета суох хортуоска буолуон наада.

Сергей Валерьевич Корепанов диэн онколог быраас, медицинскэй наука кандидата, фитотерапевт (Алтай кыраайа) эмиэ манныкка майгынныыр рецебы миома улааппатын туһугар сүбэлиир: "Для замедления роста миомы принимаются овощные соки: картофельный, морковный, свекольный. Чередуются курсами в 10-14 дней по 0,5-1 стакану в день за 30 минут до еды, свежеприготовленные. Исключение - сок свеклы. Чтобы не вызвать неприятных ощущений в пищеварительном тракте, он должен постоять 3-4 часа."

Бу биһиги төһө баҕарар булар-талар, оҕуруокка олордор үүнээйилэрбит буолаллар, онон күннэтэ сиир аспыт туһатын билиэххэйиҥ уонна өссө даҕаны билэ туруоххайыҥ, туһаныаххайыҥ.

Эмтэниини бу инньинэ суруллубут сүбэлэри кытта бииргэ дьүөрэлээн, нуорма ууну иһэн, төһө кыалларынан хайаан даҕаны эбии хамсаныыны киллэрэн, тымныыга сөптөөхтүк таҥнан, чөл олоҕу тутуһарга күүстээх санааны ылынан, бэйэ бодотун тардынан, күннэтэ махталлаах уонна тапталлаах сырыттахпытына эмтэнии көдьүүстээх буолара саарбаҕа суох.

Доруобай, чэгиэн-чэбдик буолуҥ! 🌿

Сүһүөх ыарыыларын профилактикатыгар хайаан даҕаны анал диета тутуһуллуохтаах, ону диета курдук буолбакка, баар олохпут быһыытын-майгытын (образ жизни) курдук ылыннаха чэпчэки буолар. Элбэх саахар, маҥан бурдук, доруоһалаах ас ким даҕаны доруобуйатын тупсарбат.
Аккаастаныахтаахпыт саахардаах, маргариннаах өлгөм минньигэс астан, бу манна маҕаһыыҥҥа атыыланар минньигэс ас барыта кэриэтэ киирэр, сахарозаменителлэртэн, элбэх туустаах уонна маринованнай астан, кэнсиэрбэлэртэн, копченай астан, араас ароматизатордаах астан (искусственные ароматизаторы, красители, уселители вкуса, соусы, кетчупы, майонезы). Биллэ аччатыахтаахпыт маҥан бурдугу (мука пшеничная высшего сорта), доруоһалаах аһы, ыһаарыланар аспытын, мокоруоннары, өр көйөрүллүбүт хойуу хара чэйи уонна растворимай кофелары, үүтү аҕыйатар ордук, тетрапакеттаах аһы аҕыйатабыт, онно элбэх химия туттуллар. Бу астар сүһүрүүнү (воспалениены) күүһүрдэллэр. Үрүҥ астан нуормалаан бэйэбит иэдьэгэйбитин, суораппытын сиибит, ол эбэтэр ферментацияны ааспыт үрүҥ аһы.

Хас биирдии киһи тус-туһунан буоллаҕа, биир быраабыла суох. Туруоруллубут диагнозтан эмиэ элбэх тутулуктаах. Ол эрэн сүрүннээн бу курдук диэн санаабын суруйдум. Сарсын өссө биир интэриэһинэй эмтэнэр рецебы таһаарыам.

Салҕыы суруйдахха, сүһүөх ыарыытыгар уонна профилактикатыгар биһиэхэ көмө буолар астартан СЕЛЕН диэн эттигинэн баай астар кэлэллэр. Селена - греческэй мифологияҕа ый таҥарата буолар, кини аатынан химическэй элемент ааттаныллыбыт, онон киһи ыйа суох сатамматын курдук бу элемена суох сатаммат. Кини күүстээх антиоксидант буолар, ону таһынан төрүүр-ууһуур органнар, щитовиднай железа былчархайдарын, ол аата үгүс гормоннар үлэлэрин иилиир-саҕалыыр элемент буолар. Онтон селен туһунан сүһүөххэ туһаайан эттэххэ күүстээх сүһүрүү ыарыытын мүлүрүтэр диэн эбит. Хомойуох иһин киһи сааһыран истэҕин аайы бу элемент аччаан киирэн барар диэн дакаастаммыт, ол иһин эбии сиэниллэрэ ирдэнэр. Селен баар цельнозерновой бурдукпутугар, пророщеннай сэлиэһинэйгэ (ростки пшеницы), эбиэскэ (овес), бороҥ дьүһүннээх рис курууппаҕа, ынахпыт этигэр (100 гр ~ 33 мкг), сымыыкка (1 устуукаҕа ~15 мкг), суораппытыгар (250 гр ~9 мкг). Онтон селенынан баай, чемпион үүнээйи бразильскай эриэхэ буолар эбит, 1 эриэхэҕэ ~90 мкг селен баар диэн ааҕаллар. Бу эриэхэ улахан соҕус кээмэйдээх - тойон эрбэххинэн, атыыга баар буолааччы. Бразильскай эриэхэ күннээҕи нуормата 1-2 устуука буолар, онтон элбэҕи сиэниллибэт. Подросток оҕоҕо уонна улахан киһиэхэ селеҥҥа күннээҕи нуормабыт 55 мкг диэн бэлиэтэнэр.

Артрикка сүһүөх өҥүргэһэ мөлтүүр (суставный хрящ), онтукайбыт коллагентан турар. Онтон коллагены харыстыыр С битэмиин буолар. Күннээҕи аспытыгар С битэмиин хаппыыстабыт бары көрүҥэр элбэх, ордук тууһаммыт хаппыстаҕа, биэрэскэ, күөх үүнээйилэргэ. Кэлии астарга - апельсиҥҥа, лимоҥҥа, кивига, клубникаҕа. Биллэн туран бэйэбит отоннорбутугар элбэх - моонньоҕоҥҥо, дөлүһүөммүт аһыгар, хаптаҕаска, малинаҕа, уулаах отоҥҥо уо.д.а. Маныаха уулаах отоҥҥо тохтоон ааһыахха наада. Уулаах отон саха дьонугар чахчы өлбөт мэҥэ уубут диэтэхпитинэ сыыспаппыт буолуо. Уулаах отоммут барахсан туох даҕаны харгыһа суох үүнээйи. Билэрдии аһа, уга барыта туһалаах, кини сүһүрүүнү эмтиир аналлаах, сүһүөх эрэ киэнин буолбакка, хааны ыраастыыр, токсиннары таһаарар, аллергияны эмтиир, сүһүөххэ мунньуллубут туустары сымнаҕастык суурайар. Отонун утаҕын саахардаабакка иһэ сатыахха наада, ириэрэн баран маарылла нөҥүө сүмэһинин ыган, оргуппакка, сылаас уунан убатыахха, мүөт буккуйуохха сөп. Уулаах отон хаан баттааһынын түһэрэр, бу дьайыыта кимиэхэ эрэ күүскэ дьайар, ол иһин намыһах хаан баттааһыннаах дьон киэһээ эрэ өттүгэр эмп быһыытынан иһиэхтэрин сөп. Итиилии уонна тымныылыы иһэр эмиэ тус-туспа дьайыылаах, ону көрүнээриҥ, бэйэҕитинэн бэрэбиэркэлээриҥ.
Коллагеммытыгар төнүннэххэ биир көмөлөөх үүнээйибит кучу (иван-чай) буолар. Бу үгүс дьон билэр, хомуйар ото. Кини элбэх С битэмиинэ уонна аминокислоталара коллаген оҥоһуллан тахсарыгар олус наада эбит уонна сүһүрүүнү (воспалениены) биллэрдик мүлүрүтэр. Кини күөх сэбирдэҕэ өр иһиллибэт, онон курс быһыытынан иһэр туһааннаах (10-14 күн).
Сүһүөх ыарыыларыгар көмөлөһөр өссө элбэх үүнээйилээхпит, чэ ол туспа кэпсээн буолар.

Билиҥҥи медицина артрит 100 көрүҥүн араарар эбит, эчи элбэҕин эрэ диибит, сүһүөхпүтүгэр этэҥҥэ турарбыт дьол буоллаҕа. Сүһүөхпүт ыалдьыбатын уонна ыарыытын мүлүрүтэр туһугар ас нөҥүө хайдах көмөлөһүөхпүтүн сөбүй?