🥩🥩🥩Идэһэ-2024🥩🥩🥩Бүгүн Майаҕа, сэтинньи 15 күнүгэр, улууспутугар сылын аайы ыытыллар, дьон кыһыҥҥы аһын хаһаанар, үтүө үгэс буолбут "ИДЭҺЭ-2024" атыы-эргиэн быыстапка-дьаарбаҥката буолла. Улуустааҕы "Кыталык" уопсастыбаннай киин дьиэтин иһигэр, таһыгар, сарсыардаттан дьон тоҕуоруһа мустан, сылы быһа иитэн-оҥорон таһаарбыт бородууксуйаларын хото атыылаан, атыылаһан, бар дьон көрүүтүгэр таһааран тэрээһин таһаарыылаахтык ааста.
Майа дьаһалтатын үлэһиттэрэ дьаарбаҥка ыалдьыттарын собо миинин буһаран күндүлээтилэр. Олохтоохтор, ыалдьыттар итии собо миинин, амсайан олус астынан махталларын биллэрдилэр. Сылын ахсын буоларын курдук дьаһалта, АХУМС тэрилтэ уолаттара аҕам саастаахтарга, кэрэ аҥардарга атыыласпыт эттэрин-астарын массыыналарыгар диэри илдьэн, көтөхсөн-көмөлөһөн биэрдилэр.
Дьаарбаҥкаҕа кэлбит дьон астына атыылаһан, кыһыҥҥы хаһаастарын булунан тарҕастылар. Бары кыттыбыт, тэрийсибит, кыттыспыт, ыалдьыттаабыт дьоммутугар-сэргэбитигэр махталбытын биллэрэбит.

Майа олохтоох дьаһалтата.