Карылыкка жетем десеңиз...
1. Устат табыңыз. Устаты жок адамды шайтандын азгыруусу баштайт.
2. Көп убактыңызды Куран менен өткөрүңүз. Күн сайын 3 сааттан ашык убактыңызды Куранга арнаңыз. Устатым айтчу: “Күнүнө 2-3 саат Куранга убакыт бөлө албаган адам хафыз боло албайт.”
3. Курандан алыстоо тууралуу ойлор шайтандын азгырыгы экенин түшүнүңүз. Бул улуу жолду Алла Таала сизге тандоону буйруган. Бул чоң ырайымдын кадырына жетиңиз.
4. Кээде Куранды кароого көңүлүңүз чаппай калат. (Мындайды башынан өткөргөндөр түшүнөт.) Адам болгондон кийин чарчайсыз, көңүлүңүз тартып, ниетиңиз солгундап калат. Бул дагы сынак.
Алла Таала Нажм сүрөсүндө айтат:
"Көөдөндөгү жанды алып өлтүрүүчү да, жан киргизип тирилтүүчү да – Ал өзү."
Устатым мындай дей турган: “Бул аяттан дагы бир маанини түшүнүүгө болот: ниетти берүүчү да, алууну чечүүчү да Алла Таала.”
Демек, Алла Таала: “Хафыз болом дедиң, ниетиңди алып койсом сөзүмдү таштап кетесиңби?” – деп сынашы мүмкүн.
Жөн гана токтоп калбаңыз. Эч нерсеге карабастан улантыңыз.
Ниеттин солгундашы күнөөлөрдөн болушу мүмкүн. Көп истигфар айтыңыз (Имран сүрөсү, 147-аят).
5. Куран жаттоого кеңештер:
Эгер жаңыдан жаттай баштасаңыз, алгач кыйынчылыктар болот. Эсиңиз төмөн, тилиңиз Куранга көнө элек, тез окуй албайсыз. Жарым барак жаттоо чоң нерседей сезилет. Бул кадимки эле көрүнүш. Башында эле “колумдан келбейт” деп көңүлүңүздү сындырбаңыз.
Жаттоону тапшыраардан 1 күн мурун жаттап алууга аракет кылыңыз. Ошондо оңой жана ишенимдүү болот.
Жаттоо ыкмасы ар кимде ар башка. Өзүмө жакшы жардам берген ыкманы бөлүшөйүн:
1 бет жаттоону эки бөлүңүз. Биринчи жарымын 33 жолу окуп, андан соң жаттап баштаңыз. Андан кийин жаттаган бөлүгүңүздү 33 жолу жатка окуңуз. Экинчи жарымына да ушундай кылыңыз. Андан соң экөөнү бириктирип жатка окуңуз.
Бул ыкма үчүн сабыр талап кылынат. 15 жолу окуганда эле “болду, жатталып калды” деп токтоткуңуз келет, бирок 33 жолу окусаңыз, пайдалуу жана узак убакытка эсибизде сакталып калат.
Убакыттын өтүшү менен Алла Таала эс тутумуңузду күчөтүп, жөн гана окуу менен жаттай турган абалга жетесиз. Аллаху акбар!
6. Эс тутум жөнүндө кабатыр болбоңуз. Ал – Алланын бергени. Сизден талап кылынганы – тынымсыз жаттоо, дуба кылуу жана түнкү тахажуд намазына туруп дуба кылуу.
Мен үчүн 1 барак жаттоо өтө чоң жетишкендик көрүнчү. Азыр дагы ошондой, бирок Куранды 5, 10, 15, ал тургай 22-32 барактан жаттаган адамдарды көрүп, Алланын улуулугун сезесиз. Ал кааласа, бардык нерсе мүмкүн экен.
Бул кеңештер биринчи кезекте өзүм үчүн жазылды. 🤍
Алла Таала баарыбызга хафыз болууну жана Куранды жүрөгүбүздө Өзү ыраазы боло турган деңгээлде сактоону насип этсин!❤️🩹
