#Нарсулуу_ГУРГУБАЙ

* * *

Жылт этип асманында жылдыз учуп,
бейкапар жатса экен деп, өскөн жери,
кар күрөйт чоочун шаарда кыргыз киши,
кар күрөйт таңкы саат төрттөн бери.

Кишинин жашоо үчүн жан үрөгөн,
жолу кар, көргөнү кар, көңүлү кар.
Качандыр карда калган жаны менен,
көңүлү сыздап кошо ооруйт чыгар…

Алыста балдарынын сырын, сыйын,
сүйүүсүн жашап жүрөт сатып алып.
Күн жалмап, күрөк тилген турмушунун,
бели морт, бети күйүк, башы жарык…

Кар баскан тагдырынан чарчайт киши.
Чыдамы чыйрыккандыр, түгөнгөндүр...
Жылт этип жылдыз учкан асман үчүн,
кар менен каяккадыр күрөлдү өмүр…

Бул шаардын кечи санаа, таңы санаа.
Күн алыс күрөктөрдүн сабы бошойт.
Өзүнүн асманынын кары гана,
апакай тилек менен жаады окшойт.

Жылт этип асманында жылдыз учуп,
бейкапар жатса экен деп, өскөн жери,
кар күрөйт чоочун шаарда кыргыз киши,
кар күрөйт таңкы саат төрттөн бери.


____________________

👉 "КЫСКА-НУСКА"

🖌️ Авторлор

🙏 Колдоо көрсөтүү