🎶
Ырыа - түүр омуктары сомоҕолуур күүс!Бу сарсыарда «Саҥа күн» биэриигэ «Домбра» диэн саҥа клип сүрэхтэнэн, үгүс дьон болҕомтотун тарта. Ырыаны кырачаан
Архан Уйгу (Алексеев) үс тылынан - казахтыы, сахалыы уонна ногайдыы толордо.
Айымньы хайдах толкуйдаммытын, олоххо киирбитин туһунан Архан аҕата
Семен Алексеев сэһэргээһинин көрүҥ.
Семен «Ый суола» бөлөххө бас-гитараҕа оонньооччу, ырыа айааччы. Итини таһынан боксанан, тайбоксанан, кикбоксанан утумнаахтык дьарыктаммыта. Бииргэ төрөөбүт быраата
Эллэй эмиэ музыка айааччы, аранжировщик.
Кинилэр Саха сиригэр биллэр дьон удьуордарын утумнааччылар. Эһэлэрэ
Иннокентий Тихонович Васильев, дьоҥҥо биллэринэн
И.Васильев, Саха сиригэр бастакы спорт музейын төрүттээбитэ, ааттаах фотограф этэ. Убайа
Василий Тихонович эмиэ өрөспүүбүлүкэҕэ биллэр хаартыскаҕа түһэрээччи. Бииргэ төрөөбүттэрэ
Марфа Тихоновна Данилова 90-ча ырыалаах самодеятельнай композитор. Эбэлэрэ
Мария Петровна Охлопкова Мэҥэ Хаҥалас улууһугар ытыктанар учуутал, РСФСР үөрэҕириитин туйгуна этэ.
Маннык үтүө дьон сыдьааннара, кырачаан
Архан Уйгу (Алексеев) айар аартыга арылыннын, этэҥҥэ эрэ сырыттын диэн алҕыахпытын баҕарабыт!
Родион Кривогорницын@nvk_sakha