Кыргыз Поэзиясы

#Алик_АКИМАЛИЕВ

ШЕРТ

Арак менен адам туулат кас чыгып,
Шарап чыгат көздөн ачуу жаш сыгып.
Жалыны бар жакшы иш жасайм ичпестен,
Мейли, ич өрттөйт, ойлор, ыйлар мас кылып.

Ийле, тагдыр! Кирдет көңүл уу жайгын;
“Таткын дейсиң, - бал маңызын буудайдын.
Жубар таңда чайкагандай кыз жүзүн,
Жууйт жүрөк сарсанаасын убайдын.

Азгырдың бой жүрсөм кээде ачкараак,
Арманым күч, маанайым түнт, баш чатак.
Мээ сергитип, бой эритип суусунга,
Мен пивону жуткум келген «бочкалап».

«Буу мончодон чыккан ендүү тазалан»,
Арыл, - дейт бу жазмыш, - күнөө, жазадан».
Жок! Эргүүнүн кереги жок жасалма,
Ыр жаратат тунук акыл, адал жан!

Мен жоопкер эл үмүтүн сеземин,
Ой гүлдөтөт айыл... шаар... өзөнүм.
Чың ден соолук, тынчтык каалап дүйнөгө,
Кел ичелик, Хайём, Мидин, Есенин!

Журттун акын жылдыздары көрк чыгаан!
Түтөбөйүн түйшүктө бер, эрк, чыдам.
Бирден миңге жарык сүйүү жакшылык,
Бир сиздерге туздаамдаш шерт кылам:

“Тагдыр жеке кайгы берсин чөкпөймүн,
Мен эч качан арак ичип кетпеймин.
Кыжылдак сөз, майдачылык, пастыкты,
Кызыл жалын ырлар жазып өрттөймүн”.


____________________

👉 "КЫСКА-НУСКА"

🖌️ Авторлор

🙏 Колдоо көрсөтүү

#Гүлзат_ОРМОНБЕКОВА

*  *  *

Шыбырың турат… жадымдан кетпей “жакшынам”,
Тагдырлар кайчы, таалайым жарты
Жакшы жан.
Тарк этсе бир күн дүйнөнү ушул өмүрүм,
Таптаттуу сүйүү татканым калаар жакшыдан.

Өзөккө кеткен бүтөлгүс жара, жарака,
Болобу аны кайрадан тигип-жамаса?
Сен жаша түгөл, бактыңа болуп тилектеш,
Аздектеп сени кыялда жүрөм жанаша.

Көңүлүм жарты… сезимим жарты өнө албай,
Буулугат дүйнөм тагдырды жазган жеңе албай.
Жалгыздык деген зардабы күчтүү жан оору,
Жан ширин экен, ага да көндүм өлө албай.

Кумарлуу кездер… кумарлуу көздөр танчу эс,
Кылгыра тиктеп… кыялбай…
“кетпе… калчы …” деп.
Оо, андан бери бүлдүркөн даамдуу эрдимден,
Сумсайтып мерез мезгилдер өптү канча ирет…

Черткилеп тырс-тырс, өпкүлөп алып терезем,
Тамчылар акса… көлкүлдөп жашым, эх, эчен.
Жамгырга кошо буулуга ыйлап алганым
Кантейин анан… кантейин аны сезбесең…

Көрүүгө куштар, ынтызар болуп дегдесем,
Көндүргөн тагдыр, сурансам бербес “бер” десем.
Көкөйүм кескен кайрыгым обон, күүдөйүм
Көңүлдүн дартын унутам сени эстесем.

Эрдиңдин кетпей татымы калган эсимде,
Эстесем дүрт деп кан дүргүй түшөт сезимге,
Түшүмө кирет кылыгың кошо назым да
Элжиреп сүйүп, өпкөнүң балкып-эзиле.

Өкүттө өмүр… өкүттө жаштык куураган,
Өкүнтөт кээде… өксүбөй кантип тура алам.
Кусалык эзсе жаныма даба бир арга,
Саптарга гана сагынычымды улагам…

Көркөмүң сонун, боюма боюң жарашып,
Көйкөлүп бассак көлдөгү куудай жарашык.
Тушалган сезим… чындыгың кургур куу турмуш,
Тагдырым болдуң… сагынып жүрөм жан ачып…


____________________

👉 "КЫСКА-НУСКА"

🖌️ Авторлор

🙏 Колдоо көрсөтүү

#Бактыгүл_КӨКӨТАЕВА

*  *  *

Төгөт, төгөт, төгөт жамгыр тышта түн,
Мен да жаанда, мен да тышта, түндөмүн.
Төккөн күнгө бактым өңдүү сүйүнүп,
Өткөн күнгө ыйлай албай келемин.

Жашаганы билбейм бирок, кечтим күн.
Тазалыгын кимдер туйду жүрөктүн ...
Адамдарга чачып жүрүп сүйүүмдү,
А мен өзүм тазарбастан кирдепмин.

Көктө сүзгөн кыялдарым жок болуп...
Көптөр жүргөн көчө менен агылам.
Бирок дале бир жүрөккө багынып,
Бирок дале бир жашоону сагынам.

А сиз кайда, каяктасыз бул тапта,
Азыркы жаан кеттиби же чачылтып.
Асыл жаның аяп аккан тамчыны,
Акын жаның турса керек жанчылып.

Барам сизге бакыты зор бир күнү,
Балким ушул жааны катуу түндөрдө.
Сен жөнүндө айтсам дагы чоң жомок,
Мен жөнүндө туйган жоксуң эч нерсе.

Кайта эле мен жамгырлардан суурулуп,
Кайта эле мен кара ойлордон кирдеймин.
Калгандыктан өзүмдү эбак унутуп,
Канча жерге жөө келгеним билбеймин.

Чарт этип күн жамгыр дале төгүлүп,
Чагылгандан жолдор кетет көрүнүп.
Сен да азыр мени туйбас сыяктуу,
Мен да мынча жаанда калган эмесмин.

Төгөт, төгөт, төгөт жамгыр тышта түн.
Мен да жаанда, мен да тышта, түндөмүн...
Төккөн күнгө бактым өңдүү сүйүнүп.
Өткөн күнгө ыйлай албай келемин.


____________________

👉 "КЫСКА-НУСКА"

🖌️ Авторлор

🙏 Колдоо көрсөтүү