#Тайир_АШИРБАЙ

КЕЛЕТ, КЕЛБЕЙТ

Алты кабат асманды дептер кылып,
Ак баракка өзүмдү жазгым келет.
Уч-кыйырсыз созулган чектен чыгып,
Улуу сөздүн уңгусун казгым келет.

Жети түскө жуурулган тереңдикти
Жерден эмес, мен көктөн тапкым келет.
Саманчынын Жолундай кенендикти
Сан-өлчөмсүз жүрөктө ачкым келет.

Көкүрөгүн көтөрүп өскөн тоого
Көгүш арча сыяктуу чыккым келет.
Коңур үндүү кош улар өткөн жолдон
Кошогу жок жомокту уккум келет.

Эргүүлөрүм жетчүдөй миң кылымга,
Эртеңки күн дал бүгүн колун сермейт.
Келечегим  кеңирсийт, чындыгында,
Кыялыма чекитти койгум келбейт.


____________________

👉 "КЫСКА-НУСКА"

🖌️ Авторлор

🙏 Колдоо көрсөтүү