“БЕЙИШТЕГИ АЯЛДАРДЫН ХАНЫШАСЫ БОЛГОН АЗИРЕТИ ФАТИМА (р.а)”.
Белгилей кетсек, пайгамбарыбыз Мухаммеддин (Алланын ага салам-салаваттары болсун) 6 баласынын 5өө Хадижа энебизден, ал эми Ибрахим гана Мариядан төрөлгөн.
Ошентип Фатимадан гана Пайгамбарыбыздын тукуму уланган.
Фатима Пайгамбарыбыздын Меккеде пайгамбарлык миссиясы башталгандан 1 жылдан соң, айрым булактар боюнча 5 жылдан соң төрөлгөн. Алла элчисинин кызы атасы тарткан түйшүктөрдү бирге тартып, эң оор учурларда анын жанында болгон. Меккеликтердин Пайгамбарыбызды шылдыңдап, басынтуу иш-аракеттеринин көбүнө Фатима кичинекейинен күбө болгон. Бир окуяны айтып берели: Күндөрдүн биринде Пайгамбарыбыз каабанын алдында сыйынып отурган. Анын жанында исламдын жана пайгамбарыбыздын душмандары Абу Жахль, Укба ибн Абу Муайт, Шейба да бар эле. Абу Жахль санаалаштарына төөнүн ичеги-карынын Пайгамбарыбыздын аркасына (далысына) төгүп салууну сунуштайт. Муну менен ал Алла элчисин басмырлап, төмөндөткүсү келген. Абу Жахль кезинде Пайгамбарыбыз намаз окуп жаткан убакта, башын саждага койгондо моюнун тепселеп, ар кандай таштандыларды Пайгамбарыбызга ыргыткан жоруктары бар эле. Укба абу Жахльдын айтканын колдоп, Алла Элчиси сажда кылып жатканда төөнүн ичеги-карынын анын далысына төгүп иет. Бул убакта башка карап турган элдер каткырып күлүшүп, Пайгамбарыбызды шылдыңга алышат. Ошондо кичинекей Фатима чуркап келип, атасынын далысындагы таштандыларды тазалап, ыйлай баштаган. Элестетип көрүңүз, ошондо кичинекей Фатима кандай кордукту сезген? Атасы көздөрү жашка толгон Фатиманы (Аллах андан ыраазы болсун) карап:
“Ыйлаба кызым, чындыгында, Аллах сенин атаңа жардам берет. Аллах сенин атаңа жеңиш тартуулайт”, -деген.
Фатима толугу менен ислам тарбиясында чоңойгон. Апасы Хадижа менен көп убакыт бирге болуп, анын кулк-мүнөзүн, адеп-ахлагын сиңирип алган.
Пайгамбарыбыздын таянычы, жубайы Хадижа менен абасы Абу Талиб дүйнөдөн кайтканда, ал чоң кайгы тарткан. Бул убакта Фатима атасынын жанында болуп, ар тараптуу колдоо көрсөткөн. Үйдө тамак жасап, апасынын ордун баскан. Ошондуктан да, Фатиманын лакап аты “Умм Абиха- атасынын апасы”.
Фатиманын дагы бир лакап аттарынын бири- “аз Захра – нур жүздүү, жарык жүздүү”. Нур жүздүү Пайгамбарыбыздын кызы да албетте толгон айдай жаркырап турган.
Фатима атасынын мүнөзүнүн көп жерлерин сиңирип алган. Алла Элчисинин 3-жубайы Айша (Аллах андан ыраазы болсун) Фатима тууралуу минтип айткан:
“Мен Пайгамбарга сөзүндө жана мүнөзүндө ушунчалык окшош болгон Фатимадан башка адамды жолуктурган эмесмин”.
Алла Элчиси кызын жанынан артык жакшы көргөн. Ал Фатиманы “Бейиштеги айымдардын ханышасы, алдыңкысы” деп айткан.
Айша (Аллах андан ыраазы болсун) :
“Фатима Пайгамбарыбыз отурган бөлмөгө киргенде ал ордунан туруп, кызынын жүзүнөн сүйүп, колунан жетелеп, өзү отурган жерге отургузчу. Ушуну менен ал сүйүктүү кызына урмат көрсөтүп, анын даражасынын бийиктигин билдирген”.
Ошондуктан пайгамбарыбыз Мухаммед (Алланын ага салам-салаваттары болсун) Фатимага ханышага кылгандай мамиле жасаган. Бирок “ханышага кылган мамиледей” дегенде, бизге көндүм болгон кымбат баалуу үй, машина, эң кооз кийимдер эмес. Алла элчиси кызынын ички жан дүйнөсүнө, адеп-ахлагына, Аллахка жакындоодогу амалдарына өтө чоң маани берген. Фатиманын колун сурап, канчалаган бай сахабалар пайгамбарыбыздын алдына келишкен. Бирок Алла Элчиси Фатиманы калканынан башка эч нерсеси жок Алиге (Аллах андан ыраазы болсун) турмушка берген.
Али Фатиманын колун сурап келгенде, анын сүрдөп жатканын сезген Алла элчиси, Алинин сүрдөгөнүн токтотуш үчүн өзү биринчи: “Сен Фатиманын колун суроого келдиң окшойт”, - дейт. “Ооба”,- деп жооп берет Али. Анда Пайгамбарыбыз: “Махрга эмне даярдадың?”, - дейт. Алинин колундагы калканынан башка эч нерсеси жок эле. Пайгамбарыбыз Алиге (Аллах андан ыраазы болсун): “Сен калканыңды сатып, андан түшкөн акчаны махрга колдонбойсуңбу”, - деп кеңеш берет. Али так ошондой кылат.
Фатима менен Алинин үй-бүлөсү чоң сүйүү менен сый-урматта курулуп, Хасан, Хусейн, Мухсин аттуу балдары жана Зайнаб менен Умм Кульсум аттуу кыздары болгон.
