Дьокуускайга, кулун тутар 25 уонна 26 күннэригэр, Чурапчы улууһа төрүттэммитэ 95 сылыгар анаммыт Чурапчы күннэрэ буолуохтара. Ол иһигэр Кулаковскай аатынан Норуоттар доҕордоһууларын дьиэтигэр «Чурапчы улууһун историята: бэҕэһээ, бүгүн, сарсын» диэн быыстапка, Күннэри үөрүүлээх быһыыга- майгыга арыйыы, «Алаас ахтылҕана» уус- уран самодеятельность кэнсиэрэ былааннаммыт.
Ону тэҥэ Национальнай бибилэтиэкэҕэ судаарыстыбаннай деятель, СӨ Төрүт сокуоҥҥа сэбиэтин бэрэссэдээтэлин солбуйааччы, РФ уонна СӨ үтүөлээх юриһа А.М. Ефимов «Заметки якутского путешественника» саҥа кинигэтин сүрэхтэниитэ буолуохтаах.
Кулун тутар 26 күнүгэр Саха академическай тыйаатырга «Куруубай хааннаах Кулун Куллустуур» олоҥхо- испэктээги (режиссер Бушков И.И.) көрдөрүөхтэрэ.
Бүгүн Кулаковскай аатынан Норуоттар доҕордоһууларын дьиэтигэр сарсыарда 10 ч. «Чурапчы» ТХПК бастыҥ, хаачыстыбалаах аһын- үөлүн быыстапкалаах атыыта ыытыллыа диэбиттэр.