Azamat_LIVE KG

УКМК “Temirov Live” жана “Kлооптун” алтын кен боюнча иликтөөлөрүнө жооп берди

✔️УКМК «Kloop» жана «Temirov Live» басылмаларына жарыяланган УКМК башчысы Камчыбек Ташиевдин Насоновское алтын кенине тиешеси бар болушу мүмкүн деген маалыматын чындыкка дал келбей турганын билдирди. Билдирүүдө аталган кендин жалгыз ээси КР жараны Боотаев Азрет Түркмөнович экени айтылат. Ал мурда кылмыштуу топко катыштыгы бар экени белгиленген.

✔️Ошондой эле аталган кен «Консульер Групп» ЖЧКсына сатылганы аныкталган.

“Бирок, кийинчерээк «Консульер Групп» ЖЧКсы Насоновское кенин сатып алгандан кийин мамлекетке жүктөлгөн милдеттенмелерди аткарбаганы, ошондой эле жергиликтүү өз алдынча башкаруу органдарынын алдындагы социалдык милдеттенмелерди өз убагында төлөбөгөндүгү, салыктык карыздары бар экендиги жана заводдун өндүрүшүн өнүктүрүүгө инвестиция тартпаганы, анын иш-аракетинде Кыргыз Республикасынын мыйзамдарын бузуулар аныкталган. Натыйжада ушул жылдын, 12-мартында мамлекеттин балансына өткөн”
- деп айтылат билдирүүдө.

Көк бөрү оюнундагы улакчынын өлүмү боюнча эки адам кармалды

✔️Нооруз-2025 турниринде көкбөрүчүнүн өлүмү боюнча кылмыш иши козголуп, "Бүркүт" командасынын оюнчусу жана калыс кармалды.

✔️Милициянын айтымында, оюн эрежеси одоно бузулган. «Ден соолукка атайылап оор залал келтирүү» беренеси боюнча иликтөө иштери жүрүп, экспертизалар дайындалды.

✔️Бишкек шаардык ички иштер башкы башкармалыгынын убактылуу кармоочу жайына 29 жаштагы улакчы А.Ч. жана 42 жаштагы калыс Ш.У. киргизилди.

Бүгүн, 13-мартта кыргыз-тажик чек арасындагы эки өткөрмө бекет кайра ачылат

13-март күнү Кыргызстан менен Тажикстандын мамлекеттик чек арасы жөнүндөгү келишимге эки өлкөнүн президенттери кол койгондон кийин чек арадагы эки өткөрмө бекети кайра ачылат. Бул тууралуу Чек ара кызматынын башчысы Абдикарим Алимбаев билдирди.

Анын сөзүнө караганда, Баткен районундагы "Кызыл-Бел" өткөрмө бекети эл аралык деңгээлде, ал эми Лейлек районундагы "Кайрагач" бекети эки тараптуу болуп ачылат. Ал эми эки мамлекеттин чек арасындагы калган үч өткөрмө бекетин ачуу этап-этабы менен жүрмөкчү.

Бүгүн, 12-мартта, “Ала-Арча” мамлекеттик жаратылыш паркында Кыргыз Республикасынын Президенти Садыр Жапаров менен Тажикстан Республикасынын Президенти Эмомали Рахмон, анын өлкөгө жасаган мамлекеттик сапарынын алкагында уюштурулган этномаданий программа менен таанышты.

Эки өлкөнүн лидерлери келгенинде аларды төкмө акындар, “Алп” баатырлар жана “Аталар изи” аттуу топтомунан улуттук кийим кийген кыздар салтанаттуу тосуп алышты.

Мамлекет башчылары кол өнөрчүлөрдүн аллеясында боз үйлөрдүн инсталляцияларында чагылдырылган көчмөн элдин жашоосу менен таанышты. Алар кыргыз элинин салттуу тиричилигинин атмосферасына чөмүлүп, кол өнөрчүлөрдүн устаканаларда уникалдуу буюм-тайым жасап жаткандарын көрүп чыгышты.

Көргөзмөнү көрүп чыккандан кийин президенттер Хан боз үйдүн сыйлуу жеринен орун алышты.

Этномаданий программанын алкагында Ч. Исабаев атындагы “Камбаркан” фольклордук-этнографиялык ансамбли жана Н. Түгөлов атындагы Мамлекеттик “Ак-Марал” бий ансамблинин катышуусунда концерт коюлду.