Тукай мәхалләсе🌙

Туган җир. Туган авыл. Йөрәккә шундый якын, шундый кадерле сүзләр! Һәрберебезнең туган йорты, газиз нигезе урнашкан, кадерле туган авылы бар. Һәр авылның үзенә генә хас, кабатланмас, истә кала торган урыннары бар.
Һәрбер авылның гоурлыгы, күрке, әлбәттә, - мәчетләре!
Тукай Чувашиянең башка авылларыннан бердәм-тату  булуы белән аерылып тора. Авылның шактый зур булуына карамастан (500 хуҗалык), монда мәчет берәү генә. 2000 елларның башларында икенче мәчет төзергә дигән фикер дә булган. Тик ул вакытта авылның хөрмәтле имамы Бәдредтин хәзрәт, мәчет картлары белән киңәшеп, мондый тәкъдимгә каршы чыга. Анардан соң дингә хезмәт иткән имамнар да бердәмлекне саклап килә. Авыл халкы иманын ныгытсын, дини белем алсын диеп, тирә-якта булмаган мөһабәт мәдрәсә төзелә.
Инде гает намазларына мәхәллә халкы сыешмый башлагач, 2023 елның Рамазан ае узгач, иске мәчет нигезендә яңа мәчет төзергә керешәләр. Ике ел өчендә шундый матур, мөһабәт мәчет калкып чыга.
Хәзерге вакытта мөчетнең диварларын гына буйыйсы калган. Тиз арада, Аллаһ ярдәме белән, әлеге эшләрне дә башкарып, бердәмлекне тагын да ныгытып, Тукай авылы халкына яңа мәчеттә гыйбәдәт кылырга насыйп итсен!
Шушы изге эшне оештырган, тормышка ашырган, Аллаһ ризалыгы өчен көч куйган, үз хәләл малларын садака итеп тапшырган һәр кешедән Аллаһ риза булсын!
Киләчәктә дә барчабызга, бердәмлекне, туган авылыбызның матурлыгын, әби-бабайлардан килгән гореф- гадәтләрне, булган бәрәкәтне саклап, Аллаһ кушканча яшәргә насыйп итсен!