*Итэҕэл күннээҕи олоххо*

▪️Оһоххун арыылаах алаадьынан аһата сылдьыахтааххын - уот иччитэ үөрэр.
▪️Оһоххо ас тобоҕун, бөҕү-саҕы бэриллибэт. Уот иччитэ кыыһырыан сөп.
▪️Алтаттан киэһэ муостаҕын харбаама-сууйума - дьоллоох суолгун харбыаҥ.
▪️Кыра оҕо сыыллан улаатара үчүгэй, олоҕун суолун оҥостор дииллэр.
▪️Оҕо сыылла сылдьан сиртэн ону-маны айаҕар угарын бопсума. Иммунитетын сайыннарар.
Хайа да эмтээ5эр туһалаах.
▪️Кыыһыра-кыыһыра астаама, оннук ас киһиэхэ иҥмэт.
▪️Суунаргар ыл да мээнэ суунума, бэйэҕин алҕаан суун: «Миигин ыраастаа ыарахантан, куһаҕан
санааттан, сылайбыппыттан,
ыарыыларбыттан» - оччоҕо киһи дууһалыын ырааһырар, чэпчиир.
▪️Сарсыарда утуйан туран баран илин диэки хайыһан: “Аҕыс аанньалларым арыаллаан.
Сэттэ иэйэхситтэрим эҥэрдэһин.
Үрдүк Үрүн айыым күүс-көмө буол.
Айыы оҕотун айыы суолун оҥорон биэрэ тур.
Тускуо! Тускуо! Тускуо!”- диэн күнтэн сэниэтэ ыл.
▪️Дьоҥҥо, кыылларга үтүөнү оҥордоххо бэйэҕэр үс төгүл үтүөнэн эргиллиэ.
▪️Кыылларга эмиэ көмөлөс-аһыммакка, көрө-көрө аттынан ааһыма.
▪️Абыраабыт-көмөлөспүт дьоҥҥутугар махтаныҥ, ытыктааҥ.
▪️Ийэ оҕотун эмтэрэ олорон оҕотун алгыахтаах, инники олоҕун түстүөхтээх. Ол алгыһа кэлин туолар.
▪️Соҕотох кэмҥэр санааҕын сааһылан, толкуйдан, үчүгэйи көрбүккүн санаан утуй.
▪️Сир астыырга, бултуурга сиргин-уоккун алҕаан аһатаргын умнума.
▪️Сэргэҕэ бэлэхтэммити хомуйума, уорума - аньыы.
▪️Хатыҥҥа баайыллыбыт саламаны быһыма - аньыы.
▪️Эргэ сиэркилэни туттума - сиэркилэ туох баары барытын бэйэтигэр иҥэринэр, онно абааһылар да киириэхтэрин сөп.
▪️Бэйэҥ сиэркилэҕин ууга уган баран алгыһынан ыраастаа, оччоҕо сиэркилэҥ чэпчиэ.
▪️Түүн утуйаары сытан ытыыр улахан аньыы: эрдэ кырдьыаҥ, дьолгун сүтэриэҥ - олоҕун кылгыа.
▪️Түүннэри дьиэ иһигэр да, таһырдьа да хаһыытаама - аньыы.
▪️Хайдах да түбэлтэҕэ дьону сэнээмэ - сэнэбил киһини өлөрбүттээҕэр сэттэ төгүл аньыылаах.

Ити курдук сиэрбит-туоммут олус элбэх. Бары сиэри-туому тутуһан, ыраас санаалаах буолуоҕуҥ, сырдыкка-кэрэҕэ тардыһыаҕыҥ!✊️