SUG'ONCHI JOME MASJIDI

РЎЗАНИНГ ҲИКМАТИ

Рамазон улуғ ой бўлиб, унинг кунлари баракотлидир. Рамазон ўн бир ойнинг султони ҳисобланади. Бунинг сабаби эса, Рамазон ойи бошидан то охиригача тоат-ибодатларга бой бўлганидир. Бошқа ҳеч қайси ойда бундай ҳол кузатилмайди. Раҳмат ва мағфират, дўзахдан озод бщлиш ойи бўлган Рамазонда Аллоҳ таолодан барчамизнинг гуноҳларимизни кечиришини сўраймиз. Расулуллоҳ соллаллоҳу алайҳи ва саллам: “Сизларга Рамазон келди. Муборак ой келди. Аллоҳ бу ойнинг рўзасини фарз қилди. Бу ойда осмон эшиклари очилади, Жаҳаннам эшиклари ёпилади, шайтонлар кишанланади. Аллоҳ таолонинг бу ойда бир кечаси бор. бу кеча мингта шунақа кечаси бўлмаган ойдан афзалдир. Ким бу ойнинг яхшиликларидан маҳрум бўлса, у кўп нарсадан маҳрум бўлибди” дедилар (Имом Насоий ва Имом Аҳмад ривояти).
Ушбу ҳадисни уламоларимиз Пайғамбаримиз соллаллоҳу алайҳи ва салламнинг Рамазон кириб келиши билан қилган табриклари деб баҳо беришган. Қандай қилиб бу ой билан киши бир-бирини табрикламаслиги мумкин. Ахир бу ойда ҳар бир қилинган амал бир неча марта кўпайтирилади, шайтон кишанбанд қилинади, гуноҳлар мағфират этилади. Мусулмон одам бундай кунда хурсанд бўлмаса, қачон хурсанд бўлади.

“Эй иймон келтирганлар! Сизлардан аввалгиларга фарз қилинганидек, сизларга ҳам рўза фарз қилинди. Шоядки, тақво қилсангиз” (Бақара сураси, 183–оят).

Рўза бандани тақвога бошлайди ва Аллоҳ таолога қурбат ҳосил қилишга чорлайди. Яъни инсон Аллоҳ таолога маълум бўлган ҳолда барча шаҳватлардан ўзини тияди. Муроқаба эса ана шундай ҳолатдагина пайдо бўлади. Бу эҳсон юзасидан олинганда ҳам улкан мартабадир. Расулуллоҳ соллаллоҳу алайҳи ва саллам айтадилар: «Ҳазрати Жаброил алайҳиссалом келиб: “Эҳсон нима, ё Расулуллоҳ?” деб сўрадилар. Эҳсон бу – Раббингни кўриб турганингдек ибодат қилишингдир. Сен Уни кўра олмасанг-да, аммо У сени кўриб туради”, дедилар».
Бу ҳадис биз мусулмонларга улкан қоидани баён қилиб берган. Биз бу қоидани ҳар бир ишимизда татбиқ қилишимиз лозим. Яъни ҳар бир қиладиган ишимиз ва ибодатимизда Аллоҳ таолонинг кўриб турганини ҳис қилишимиз керак. Шунда ҳар бир амалимиз риёдан холи бўлади.
Шунингдек, Рамазон нафс тарбияси ойидир. Аллоҳ таоло Қуръони Ккаримда бундай марҳамат қилади:
«Батаҳқиқ, ким у (нафс)ни покласа, зафар топди” (Шамс сураси, 9–оят).

Нафсни Аллоҳ таоло ҳеч бир камчиликсиз яратди. Ким ўз нафсини тийса, нажот топади. Аксинча бўлса, банда нафсининг қулига айланади. Рўза инсонни сабр қилишга ундайди. Сабр уч хил бўлади:
1. Аллоҳ таолонинг тоати учун.
2. Аллоҳ таолога нисбатан қилинадиган гуноҳлар учун.
3. Аллоҳ таолонинг тақдирига сабр қилиш.
Аллоҳ таоло Қуръони каримда бундай марҳамат қилади: “…Албатта, сабр қилувчиларга мукофотлари беҳисоб берилур”(Зумар сураси, 10–оят). Қиёмат куни барча амалларга ўрнатиладиган тарози сабрга нисбатан ўрнатилмайди. Сабрнинг мукофоти беҳисоб берилади. Рўза инсонни мискин ва фақирларнинг ҳолини ҳис қилишга ундайди. Бизнинг ифторлик ва саҳарлик дастурхонимизда турли ноз-неъматлар ястаниб ётган бир пайтда бошқа бир жойда кимлардир очликдан жон беряпти. Биз бир неча соат оч қолиб турганимизда, икки ёки уч кунлаб туз тотмаганларнинг ҳолини ҳис қилишга сабабчи бўлади. Киши ўз нафсини тарбиялаб, нафсининг бахиллигидан тийилса, албатта, нажот топади.

Др. Шайх Саййид Раҳматуллоҳ ТЕРМИЗИЙ

▶️Обуна бўлишни унутманг !

☝️САВОБ УМИДИДА ДЎСТЛАРИНГИЗГА ҲАМ УЛАШИНГ!!! АЛЛОҲ РОЗИ БЎЛСИН!!!

@Sugonchi_jome_masjidi_rasmiy

Рўзадорнинг тиш пастасидан фойдаланиши

❓Cавол: Рўзадор одам тиш пастаси билан тиш ювса бўладими?
📥Жавоб: Рўзадор киши тишларини тозалашда тиш пастасидан фойдаланиши макруҳ саналади. Агар пастадан ҳосил бўлган кўпикларни ютиб юборса, рўзаси очилади. Чунки паста билан тиш тозалаш бирор нарсани татиб кўришга ўхшайди.
Фиқҳий китобларимизда бундай дейилган:
“Рўзадор бирор нарсани татиб кўрса, рўзани очувчи сурат ва моҳият топилмагани учун рў􀌮за очилмайди. Лекин бундай қилиш макруҳ ҳисобланади. Чунки бунда рўзани бузилишга олиб келиш бор” (“Ҳидоя” китоби).
Шунга кўра кўпчилик замонамиз уламолари рўзадор ҳолида тиш пастасидан фойдаланмасликни, балки уни саҳарликдан аввал ёки ифтордан кейинга қолдиришни тавсия этадилар. Зеро, ибодат масаласида эҳтиётини олиш авло саналади.
Қолаверса, Рамазон ойининг кундузлари тишларни тоза сақлаш учун мисвокдан фойдаланиш ҳам мумкин. Чунки мисвок ишлатиш билан рўза очилмайди. Бунга Расулуллоҳ соллаллоҳу алайҳи ва салламнинг рўзадор ҳолларида ундан кўп марта фойдаланганлари далил бўлади. Омир ибн Рабийъа розийаллоҳу анҳудан ривоят қилинади:
“Мен Набий соллаллоҳу алайҳи ва салламнинг рўзадор ҳолларида мисвок қилаётганларини санаб саноғига, ҳисоблаб адоғига ета олмайдиган даражада кўп кўрганман” (Имом Аҳмад ривояти).
Мисвок ишлатганда, милклар қонаса ёки оғизга сув тўпланса, ютиб юбормаслик шарт қилинади. Валлоҳу аълам.

“Фатволар тўплами”дан.

▶️Обуна бўлишни унутманг !

☝️САВОБ УМИДИДА ДЎСТЛАРИНГИЗГА ҲАМ УЛАШИНГ!!! АЛЛОҲ РОЗИ БЎЛСИН!!!

@Sugonchi_jome_masjidi_rasmiy

Сахий ва бахил

Имом Термизий “Сунани Термизий” асарида “Сахийлик” деб номланган алоҳида боб ажратган ва мазкур бобда саховатга оид қуйидаги ҳадисни келтирган:
«Сахий Аллоҳга яқин, жаннатга яқин, инсонларга яқин ва жаҳаннам оловидан узоқдир. Бахил эса, Аллоҳдан узоқ, жаннатдан узоқ, одамлардан узоқ ва жаҳаннам оловига яқиндир. Албатта, жоҳил сахий Аллоҳ таолога бахил обиддан кўра суюклироқдир».

Шарҳ: Абдуллоҳ Муборакфурий «“Туҳфа ал-аҳвозий би шарҳ “Жомиъ ат-Термизий”» асарида мазкур ҳадисни қуйидагича шарҳлаган: «Дарҳақиқат, сахий мўмин мол-давлатини керакли ўринга сарфласа, Аллоҳнинг раҳматига яқинлашади, жаннатга олиб борадиган йўлни қисқартиради ва одамларнинг муҳаббатини қозонади. Чунки инсонлар сахий одамларни яхши кўрадилар. Бахил эса, закот каби зиммасидаги фарз вазифаларни бажармагани учун Аллоҳнинг раҳматидан, жаннатдан узоқлашади, одамлар қалбида унга нисбатан ҳурматсизлик уйғонади».

▶️Обуна бўлишни унутманг !

☝️САВОБ УМИДИДА ДЎСТЛАРИНГИЗГА ҲАМ УЛАШИНГ!!! АЛЛОҲ РОЗИ БЎЛСИН!!!

@Sugonchi_jome_masjidi_rasmiy

Рўзани бузувчи омиллар

❓Савол: Қандай нарсалар рўзани бузади? Шу ҳақда батафсил маълумот берсангиз.
📥Жавоб: Рўзадор қасддан овқат еса, сув ичса, дори ичса ёки жинсий алоқа қилса рўза, бузилади. Бу ҳолатларда ҳам қазо,ҳам каффорат вожиб бўлади.
Рамазон рўзасидан бошқа рўзаларда каффорат йўқ.

Қуйидаги ҳолларда рўзадор одамнинг рўзаси бузилади ва қазосини тутиб бериши вожиб бўлади, каффорат вожиб бўлмайди:
– тонг отмаган деб ўйлаб, саҳарлик қилса ёки кун ботди деб ўйлаб оғзини очиб юборсаю сўнг тонг отиб қолгани ёки кун ботмагани билинса;
– аёлини ўпиши, ушлаши орқали жунуб бўлиб қолса;
– ҳўқна (клизма) қилса;
– бурнига дори томизса.
Беихтиёр қайт қилса рўза бузилмайди. Лекин қасддан, зўрлаб, оғзи тўлиб қайт қилса, рўзаси бузилади, кейин қазосини тутиши вожиб бўлади.

Қуйидаги ҳолатларда рўза бузилмайди:
– рўзадор эсида йўқ ҳолатда еса, ичса, жинсий алоқа қилса;
– уйқусида ёки аёлига қараб жунуб бўлиб қолса;
– қон олдирса;
– сурма қўйса;
– аёлини ўпса-ю, жунуб бўлмаса.
Лекин рўзадор одам иложи борича ўзини бундай ҳолатдан узоқ қилмоғи лозимдир.

Рўзадор учун қуйидаги ишлар макруҳдир:
– ўз нафсига ишонмаган кишининг аёлини ўпиши. Агар нафсини жиловлай олса, зарари йўқ.
– бирор нарсани татиб кўриш ва мисвокдан бошқа нарса билан тишни тозалаш,
– эмизикли рўзадор аёл ўз боласига заруратсиз таом чайнаб бериши. Бунда агар чайнамасликни имкони бўлса, чайнамаслик маъқул. Аммо имкони бўлмаса, чайнаб беришнинг зарари йўқ. Валлоҳу аълам.

“Фатволар тўплами”дан.

▶️Обуна бўлишни унутманг !

☝️САВОБ УМИДИДА ДЎСТЛАРИНГИЗГА ҲАМ УЛАШИНГ!!! АЛЛОҲ РОЗИ БЎЛСИН!!!

@Sugonchi_jome_masjidi_rasmiy

Рўзадорларга берилган бешта хислат

Ибн Аббос розияллоҳу анҳумодан ривоят қилинади: «Расулуллоҳ соллаллоҳу алайҳи васаллам шундай дедилар: «Рамазонда олдинги умматларга берилмаган бешта хислат менинг умматимга берилди:
1. Рўзадорнинг оғзидаги ҳид Аллоҳнинг наздида мушк-анбар ҳидидан ёқимлироқдир.
2. Рўзадор ифтор қилгунича ҳатто балиқлар ҳам уларнинг ҳаққига истиғфор айтиб туради.
3. Аллоҳ таоло ҳар куни унинг жаннатини зийнатлаб, сўнг унга «Солиҳ бандаларимдан машаққатлар кўтарилгач, сенга келадилар», дейди.
4. Рамазонда асов шайтонлар кишанланиб, (заифлашиб) Рамазондан бошқа ойларда қилган ишини бу ойда қила олмай қолади.
5. Рамазоннинг охирги кечасида рўзадорларнинг гуноҳлари кечирилади».
Шунда «Эй Аллоҳнинг Расули, бу Қадр кечасими?» дейишган эди, Расулуллоҳ соллаллоҳу алайҳи васаллам: «Йўқ. Банданинг амалини адо этса, ажр-савоби тўлиқ қилиб берилади», дедилар» (Имом Аҳмад, Имом Баззор ва Имом Байҳақий ривояти).

▶️Обуна бўлишни унутманг !

☝️САВОБ УМИДИДА ДЎСТЛАРИНГИЗГА ҲАМ УЛАШИНГ!!! АЛЛОҲ РОЗИ БЎЛСИН!!!

@Sugonchi_jome_masjidi_rasmiy

Дуони кўпайтиринг

Рўзадор биродарим, Қуёш ботишидан аввал сиз учун вақтларнинг энг улуғи бор. Ушбу вақт сизнинг очлигингиз ва чанқоғингиз қаттиқлашган куннинг ифтори олдидан бўлади. Айни шу маҳалда дуони кўпайтиринг, бунда бардавом бўлинг ва кўпроқ сўранг. Саҳар вақтида ҳам сизга ана шундай дуо ижобат бўладиган вақт бор. Нафсингизга Аллоҳ таолодан сўрашни юкланг. Чунки, сиз муҳтож У зот эса беҳожатдир. Сиз заиф, У зот кучлидир. Сиз фоний, У зот эса Боқийдир.

🤲 Аллоҳ таоло барча сўраганларимизга муваффақ қилсин!

▶️Обуна бўлишни унутманг !

☝️САВОБ УМИДИДА ДЎСТЛАРИНГИЗГА ҲАМ УЛАШИНГ!!! АЛЛОҲ РОЗИ БЎЛСИН!!!

@Sugonchi_jome_masjidi_rasmiy