Ростислав Павлов (дьоҥҥо Рост диэн аатынан биллэр эбит):

Комикстары оскуолаҕа сылдьыахпыттан уруһуйдуубун. Бу бэйэм тэрийбит дизайн-устуудьуйам үлэлээбитэ 6 сыл буолла. Ол эрээри сахалыы комиксы аан бастаан бэчээттээн таһаардыбыт. Саха тылын, саха култууратын туругурдарга элбэх сэргэх бырайыактар баар буоллахтарына, тылы билэ сатыыр киһи элбиэҕэ дии саныыбын. Ол иһин комикспын нууччалыы таһаарар баҕам суох. Бу бастакы "сигнальнай" тирааж, барыта бибилэтиэкэлэринэн иҥин босхо тарҕанар. Сотору формаатын кыччатан (кыраныысса таһыгар тахсар сурунаалга майгынныыр кээмэйинэн), эбии чочуйан "коммерческай" барылын таһаарар былааннаахпыт. Салгыыта эмиэ тахсан иһиэҕэ, былаан элбэх.

Ааҕан көрбүт дьон "бэртээхэй история эбит, Ростислав улахан литературнай дьоҕурдаах" диэтилэр. Уруһуйдара, дьоруойдара да бэрт үчүгэйдик толкуйдаммыттар. Салгыы "Ойуур оҕолорун" дьылҕата биһигиттэн, ааҕааччылартан эмиэ тутулуктаныа: атыылаһан бэйэбит да ааҕан, оҕолорго да аахтаран, дьоҥҥо бэлэх да гынан тарҕаттахпытына айар дьоҕурдаах дьон хоннохторо арыллан өссө да күүскэ үлэлиэхтэрэ турдаҕа!

📌  Биики Халандаар | Сурут