Azzambek Jeenbai Uulu

* * * * * * *
Жашоодогу сыноолор сабак алганга чейин кайталана берет.

* * * * * * *
Оор шарттагы иш-аракеттер комфорт түзгөн келечекке алып барат.

* * * * * * *
Тартип (дисциплина) сиздин көйгөйлөрүңүздүн 80%ын чече алат.

* * * * * * *
Декабрь сизге сюрприздерди тартуулайт, бирок сиз аракет кылуудан тартынасыз.

___
© Англисчеден которгон: Azzambek Jeenbai uulu

* * * * * * *
Башкалардан болгон күтүүң аз, өзүңдөн болгон күтүүң көп болсун. Бактылуу жашоонун сыры ушунда. Биз күтүүлөрүбүздүн курмандыгыбыз.

* * * * * * *
Сени күнүгө тандагандар менен бирге бол. Жөн гана сага маанайы түз болгондо көргүсү келгендер менен эмес.

* * * * * * *
Оор күндөрүңдө кимдир бирөөнүн сага чыдамкай болушу - сүйүүнүн эң жумшак түрлөрүнүн бири.

___
© Англисчеден которгон: Azzambek Jeenbai uulu

* * * * * * *
Сенин орточо күнүң башкалардын кыялы болушу мүмкүн, ошондуктан ар бир күнүңө шүгүр кыл.

* * * * * * *
Жөн эле ишен. Сени эч ким кокустан жолуктурган эмес. Кудай баарын пландап койгон.

* * * * * * *
Оор күндөрүңдө кимдир бирөөнүн сага чыдамкай болушу - сүйүүнүн эң жумшак түрлөрүнүн бири.

* * * * * * *
Ансыз деле көп нерседен жолдуусуң, ошого көңүл бур.

* * * * * * *
Баш тартууну кабыл ал. Жалбарба. Эч качан артынан түшпө. Өз кадырыңды бил. Өзүңдү танда.

* * * * * * *
Канчалык жасалма болсоң, чөйрөң ошончолук чоң болот. Канчалык чынчыл болсоң, чөйрөң ошончолук тар болот. Бул жалпыга белгилүү фактылар.

* * * * * * *
Канчалык оор басырыктуу болсоң, ошончолук таза ойлойсуң. Чечимдериң реакциядан эмес, ички дүйнөңдүн абалынан чыксын.

* * * * * * *
Кудай кудуреттүү. Кааласа кылат. Болор иш болду. Тилен, ишен, анан коё бер...

_
© Англисчеден которгон: Azzambek Jeenbai uulu

* * * * * * *
Кээде бүтүндөй ааламды куткаргандай кубанычтуу сезим болсо, кээде тескерисинче — чымчыктын уясын бузгандай аянычтуу абалга кириптер болосуң. Бир караганда жарга такалгандай көрүнгөнү менен чынында жаңы бийиктиктердин башаты болуп чыга келет. Же тескерисинче..

Айтор, бу дүйнө дегениңдин баш-аягы жок тура. Көргөнүбүзгө ишенип, көзүбүзгө урунганы боюнча баа бергенибиз менен иштин туура жерин көбүнесе көкүрөгүбүздөгү ички туюм менен аңдап билебиз. Башкысы, адам кандай гана иштин үстүнөн чыкпасын, натыйжага эмес аракетине жооптуу экенин унутпаса.

Турмушуң — эшек араба,
Туулдуң, калдың балээге...

Жараткандан башкага көз каранды болуу – адамдын максатка жетүүдөгү жолдорун тарытат, чоң иштерди жасоого тоскоолдук жаратат. ©AJU

* * * * * * *
Башты жерге салдырбаган жалгыз нерсе - бул чынчылдык.

* * * * * * *
Жүрөктөн чыкканды угуу - сага качан эмне керектигин билдирет. Баштан келген (акыл) менен жүрөктөн келгендин айырмасы эки башка, муну билишиң керек, үйрөн. Баштын (акыл) сүйлөгөнү - коомдун үнү, жүрөктүн сүйлөгөнү - түбөлүктүүлүктөн келет.

* * * * * * *
Түшүнгүсү келген - сүйлөгөнүңдөн дароо түшүнөт, унчукпаганыңдан да. Түшүнгүсү келбегенге кыйкырсаң да пайдасыз.

* * * * * * *
Сөздөрдө жалгандарды, жыгылганда жыландарды билүү жана башыңдан өткөргөн бүтүн кыйынчылыктарга карабай келечекке үмүт менен карай алуу, жашоого бекем кармануу, бул дүйнөдө адам бойдон калуу үчүн кээде болуп көрбөгөндөй күч-аракет керек.

* * * * * * *
Жашоодо 5 түрдүү адамдардан алыс бол:
1. Кайдан келгенин унуткандан;
2. Жалган сүйлөп, ага өзү да ишенгенден;
3. Жолго чыгып, жеке кызыкчылыгы үчүн жолдошторун (сапарлаш) саткандан;
4. Өзүн акылдуу сезип, бардык айып-кемчиликти сага оодаргандан;
5. Эң бактылуу көз ирмемин бир сүйлөм сөз менен кыйраткандан.

_____
© Которгон: Azzambek Jeenbai uulu

Түшүмө кирчи, ата...

Дубалдын аркы бетинен күрс-күрс эткен коңшунун жөтөлгөн добушу. Күрс-күрс! Жерден кудук казандагы жаңы чыккан суунун үнүндөй кээде тынымсыз күрсүлдөп алат да, кайра тынчый түшөт. Ал басылганда менин жооп жөтөлүм башталат. Күрс-күрс! Терчил жаным саат сайын көйнөк алмаштыра берип чарчап да калдым. Мунун айынан уйку да чала. Суу-тер болгон көйнөгүм менен бүт денемди сүртүп мешке жаям да, 2 саат мурда кургатканы жайган ак футболкамды кийдим. Андагы жылуулук бүтүндөй денемди сыйпалап, бир саамга жагымдуу маанай тартуулады. Кайра төшөккө оронуп, күрсүлдөп жөтөл менен алышам. Бир оңго карап, ыңгайсыздыктан кайра солго кыйшаям. Бир канча күндөн бери бир жерде жата берип денем да бул абалдан тажады. Балдарыма жукпасын деп обочолонуп жалгыз жатам. Кошуна менен жарыша жөтөлүп, үйдө жатканыма 4 күн болду. Телефон карайм, андан тажаганда өткөн-кеткенге ой салып, бир калыптагы уйку тартипсиздигинен улам кайрадан сулайган бойдон уйкуга бой таштайм...

Кара-Бак. Айылда жүрөм. Таятамдын үйүнө жанаша жайгашкан мечиттен азандын үнү жаңырды. 40 жылдан ашуун азан айткан таятамдын тааныш, кулак-мээге сиңген үнү. Аллаху-Акбар, Аллаху-Акбар!... Адатта, элдин баары мечитке чогулганда, анан таятам саатын карап азан баштайт. А биз, үйдөгүлөр таятам мечитке жөнөгөндө дааратка туруп, азан бүткөндө шаша-буша чуркай калабыз. Азыр да ошондой болду. Мечиттин кире беришинде дарбазанын үстүнө балакана (жайында отурганга даярдалган үстү жабык сөөрү) бар. Дарбазадан чуркап кирсем, балакананын тепкичинин жанында атам менен бет келип калдым. Мечиттин короосуна кире бериште жапыз дөбө болчу, таятам ошол жерден азан чакырчу. Бирок бүгүнкү азанды таятам эмес атам чакырып, дөбөдөн эми эле түшүп мечитке карай басууга камынган өңдөнөт. Ошол замат жүрөгүм токтоп, оозума сөз келбей далбастап туруп калдым. "Не болду, балам, тынччылыкпы?" - деди атам.
- Ава (атама ушундай кайрылчубуз), азан айткан сизби? - деген суроомо атам таңыркай карады. "Ооба, мен" деген жоопту түшүндүм. Менин аң-таң болгонум - таятам да, атам да каза болгон. Бирок атама "Сиз тирүүсүзбү?" деп суроо узата албадым. Кучактаган бойдон өкүрүп ыйлай баштадым. Атаганат, арман дүйнө, өлдү деген атамды тирүү көрөм деген эмине! Баягы иштеп аткандагы тер аралаш жыты ошол бойдон... Канчалык ыйладым билбейм, бирок атам "Кой ыйлаба, неге ыйлайсың?" деп сооротуп жатканын билем. Сөзүнөн корс-корс күлкү аралаш өктөм үнүн сездим...

... Күрс-күрс... Кайра кошунанын көк жөтөлүнөн ойгонуп кеттим. Үстү-башым тер, муунум бошоп, эрээркеп ыйлаганы калыптырмын. Кыштын ызгаары баштала элек эл аралаган кандай оору болду экен, дубалдын артынан уктап жаткан кишини ойготкон! Ооруда эмне, алсыз пендеге уйгактай жабышып, ичтен жей берет эмеспи. Кошунам да мен өңдүү жөтөлдөн нары боло албай убара окшойт. Башкасын коюп, күрсүлдөгөн жөтөлү менен атам экөөбүздүн жолугушуубузду бузганына капаландым. Түш болсо да атамдын жүзүн көрүп, көбүрөөк дидирлаша албаганыма өкүндүм... Ушуну менен акыркы бир аптада экинчи жолу атамды түшүмдө көрүшүм. Ойгонушум менен унутуп калбайын деп түшүмдү кайталайм. Мен сыяктуу жүрөгү жараланып жүргөн бир туугандарыма, апама, атамдын бир туугандарына айтып бергим келет. Бирок көпчүлүгүн унутуп, элес-булас эсимде калганы ушул. Анда-санда WhatsApp группадан "Мен бүгүн түшүмдө атамды көрдүм..." деген кабарды угуп, бир сүйүнүп, ошол эле учурда менин түшүмө кирбегенине ичтен сызып алмайым бар. Ата, мен сизди сагындым! 😭

Өзүмдүн бөлмөмдө эмес апам экөөңүздөрдүн бөлмөңүздө жатканымда, соо эмес ооруган кезимде, жөн жерде эмес мечитте, болгондо да сиз жакшы көргөн, өзүңүз туулуп өскөн Кара-Бакта, 40 жыл таятам, андан мурда 40 жыл чоң таятам азан чакырып кеткен мечитте жолукканыбыз мага сүйүнүч, дем берди. Бирок өзүңүз оо дүйнөдө болгонуңуз аз келгенсип, сөөгүңүз алыскы Меккеде жатканы мен үчүн ого бетер кол жеткис... 😥 Сиздин өлүмүңүз менен сыймыктанам, Кудайга шүгүр! Бирок мен башкалар өңдүү атасын сагынганда мазарын зыярат кыла албаганыма, өз колум менен топурак сала албаганыма арман кылам... Дайыма дубамдасыз, ата! 😥

21.12.2023, 03:45 | Бишкек

© Azzambek Jeenbai uulu

Ой. Ой күлүк, ой жүк.

Кечээ бир киши менен сүйлөшүп отурсам, "Оюң бир жерде эмес окшойт, маселе болсо кеңиричиликте сүйлөшөлү" - дейт. Кандай билип алганынан уялып, "Жок, баары жакшы" дей салдым шашкалактап.

– Эки ийниң көтөрүлүп турат. Адамдын ою бир жерде болбой, кыжалаттанып турганда желкеси көтөрүлүп калат. Өзүн эркин алып жүрбөгөнүнөн билсе болот, – деген оюн айтты. Таң калганымды жашырган жокмун, туура тапты же жөн гана дал келүүбү, билбейм.

Негизи желке көтөрүлүп же бүрүшүп калган учур адамда көп эле болот. Ойдун күлүктүгүнөн да оор жүк экени ушул бейм. Кечээтен бери ушуну ойлоп, ийним биротоло көтөрүлүп калды.)

Тамаша орду менен, бирок жакын адамдарың оор запкы жеп, кайгыдан башы чыкпай турганда... а сенин колуңдан башка эч нерсе келбей, же кыйратып көнүл жубатарлык сөздү жөндөп айта албаганың туталантып иет тура. Чынында адам алсыз, кези келгенде эч нерсеге жөндөмсүз байкуш макулук экени талашсыз.

___
21.11.2019 | Ош