«Кугарня» газет

– У ий пайремым еш пайремлан шотлем, садлан лишыл еҥем-влаклан пӧлекым ямдылаш тыршем. Кажне гана иктажмом ум шонен муаш логалеш. А тувыр шотышто тургыжланымаш уке. Кумыл лектеш гын, налам. Уке гын, уке.

– Чынжымак, У ий – вучымо, юзо шӱлышан, ӱшаным пӧлеклыше пайрем. Пӧртым утыжым огына сӧрастаре. Мемнан шонымаште, тӱҥжӧ – чонышто пайрем, куан, ласкалык озаланышт. Родо-тукымлан ойыртемалтше, кӱлешан пӧлекым ончылгоч налын ямдылена. А 31 декабрьыште лишыл еҥнан шочмо кечыже, кастене жапым тушто эртарена. Садлан мӧҥгыштӧ утыжым огына ямдыле. Изирак тортым, фруктым, пакчасаскам налына, йӧратыме салатым ыштена да чыла.
Лӱмын У ийлан тувырым ом нал. Тӱрлӧ йӱлалан ӱшаныше омыл. Но шушаш ийын, икшывына кушкын шумеке, У ийым утларак пайремлын эртараш шонена.

– Тиде юзо пайремым кузе палемдыме нерген ончылгочак шонаш тӱҥалам: пайрем ӱстелтӧрым мо дене сӧрастараш, могай кочкышым ышташ. У рецепт-влакым шергалын, шкаланем возенак кодаш тыршем.

Вургем нергенат ом мондо. Ешыште ме У ийлан иктаж у вургемым эре чиена. Тиде ганат кевытыште коштмо годым тувыр шинчалан пернен ыле. У ийлан пеш келшен толеш манын шоналтышымат, нальым. Тиде пайремым шӱм вургыж вучем.

– У ий марте жап шагал кодеш, чын. Но мый але нимом шот дене ышташ тӱҥалын омыл. Лачак эртыше каныш кечылаште пачерыште У ий кожым еш дене сӧрастарышна да Йӱштӧ Кугыза-влакын шествийыштым ончаш мийышна.

Ты гана У ийым ава лийшем дене вашлийына, сандене ӱстелсийым погымо шотышто шонышаш уке, мый полышкалыше веле лиям. А у вургем шотышто нелырак. Чонлан келшыше тувырым але налын шуктен омыл. Икшыве-влакын утренникыштлан веле костюм ямде. У ий деч ончычсо томашам ласкан эртараш манын, канышым налынам. Сандене чыла але радам дене ыштен шуктем манын ӱшанем.