Абу Муса (Аллах андан ыраазы болсун) риваят кылган хадисте, Пайгамбарыбыз (Ага Аллахтын салам-салаваты болсун):
«Аллах Таала мага берген туура жол менен илим, жерге жааган жамгырга окшош. Жердин бир бөлүгү түшүм бере турган жер болчу, ал өзүнө сууну сиңирди да, анын үстүнө ар түрдүү өсүмдүктөр өнүп чыкты. Ал эми жердин экинчи бөлүгү катуу болгондуктан ага суу сиңген жок. Бирок, адамдар аны ичүү, мал сугаруу жана жер сугаруу үчүн пайдаланышты. Ал эми жердин үчүнчү бөлүгү жантайма болгондуктан суу токтобостон агып кетти. Ал жерден өсүмдүктөр да өнүп чыккан жок жана суу дагы топтолгон жок. (Бул жердин биринчи жана экинчи бөлүгү) Аллах мага берген туура жолдон пайда көрүп, илим алышып, аны башкаларга үйрөтүшкөн адамдарга, (үчүнчү бөлүгү болсо) өзү илимге умтулбай жана Аллах мага берген туура жолду да кабыл албай койгон адамдарга окшош» - деп айткан. (Бухарий, Муслим).