ПолитКлиника медиа


Гео и язык канала: Киргизия, Киргизский
Категория: Новости и СМИ


ПолитКлиника - такталган гана маалыматтар!


Гео и язык канала
Киргизия, Киргизский
Категория
Новости и СМИ
Статистика
Фильтр публикаций




Бишкекте эки жеңил унаа толугу менен күйүп кетти

Бишкек шаарынын Жукеев-Пудовкин жана Аалы Токомбаев көчөлөрүнүн кесилишинде эки жеңил унаа күйүп кетти. Бул тууралуу Өзгөчө кырдаалдар министрлигинин басма сөз кызматы билдирди.

Маалыматка ылайык, унаа токтотуучу жайда турган Mazda үлгүсүндөгү унаадан өрт чыгып, өрттүн жалыны жанында токтоп турган «BMW X7» үлгүсүндөгү унаага өткөн.

Өрт кырсыгынан жабыркагандар жок. Өрттү өчүрүүгө 1 күжүрмөн эсеп тартылды.

Учурда өрттүн келип чыгуу себеби такталууда.

@politklinika


Жалпы республикалык тестирлөө 17-майдан 25-майга чейин өтөт

Бул тууралуу Билимди баалоо жана окутуунун методикалары борборунун директору Чынара Батракеева билдирди.

Ал ЖРТга каттоо 29-февралда башталганын жана 4-апрелге чейин аталган борбордун сайтында онлайн жүргүзүлө турганын эске салды.

«Негизги тестирлөөгө, ошондой эле ар бир предметтик тестке бир абитуриент үчүн каттоо төлөмүнүн баасы 470 сомду түзөт», — деди Батракеева.

@politklinika


"Жээнбековдун кол тийбестиги маселеси боюнча кол топтоо жүрүп жатат"

Жогорку Кеңеште экс-президент Сооронбай Жээнбековдун кол тийбестикти кепилдеген «экс президент» деген расмий макамына байланыштуу кол топтоо жүрүп жатканын “Азаттыкка” курган маегинде депутат Тазабек Икрамов билдирди.

Бул маселе топтун ичинде талкууланбаганын, ар бир депутат өзүнүн сунушун, ой-пикирин жалпы жыйынга алып чыкканга же комиссия түзгөнгө сунушун бере аларын айтты:

“Мындан ары эми фракциянын чечими керек болот. Кол топтоо керек болот – үчтөн бир бөлүгү депутаттардын арасынан. Бүгүнкү күнү кол топтоо болуп жатат. Фракциянын чечими чыкса, анан комитетке чыгат. Комитеттен кийин комиссия түзүлөт, ар бир фракциядан. Канчалык негизде кол тийбестигин алса болот же болбойт, аны комиссия иликтеп бүткөндөн кийин гана сот чечет” деди.

Ошондой эле, Икрамов өзү аталган кол топтоого кол койбогонун билдирди.

@politklinika


Активист Автандил Жоробековдун соту 12-мартта уланат

Бүгүн, 29-февралда Бишкек шаарынын Ленин райондук сотунда туунун өзгөрүшүнө каршы чыккан активист Автандил Жоробековдун соттук отуруму өттү.

Анда Жоробековго айыбы угузулуп, мамлекеттик айыптоочу Абасканова Кылмыш-жаза кодексинин 278-бересинин 3-бөлүгүнө ылайык айып тагылганын билдирди.

Эксперт Нурлан Сакпаев келбегенине байланыштуу соттук отурум12-мартка жылдырылды.

7-декабрда мамлекеттик тууну өзгөртүүгө каршылык билдирип чыккан активист Автандил Жоробековду милиция суракка чакыргандан кийин камаган. Анын бөгөт чарасын Бишкектин Свердлов райондук соту 8-декабрда кечинде карап, эки айга Бишкектеги №1 тергөө абагына камоо чечимин чыгарган.

@politklinika


Жогорку Кеңештин экс- депутаты Гүласал Садырбаева дүйнөдөн кайтты

Жогорку Кеңештин мурдагы депутаты Гүласал Садырбаева 72 жаш курагында дүйнөдөн кайтты. Бул тууралуу анын туугандары кабарлады.

Гүласал Садырбаева 1952-жылы 4-ноябрда Жалал-Абад облусунун Шайдан айылында туулган.

Гүласал Садырбаева парламенттин бешинчи чакырылышында “Ата Мекен” фракциясынан депутат болгон. Ал белгилүү кинорежиссёр, Жогорку Кеңештин бир нече чакырылыштарынын депутаты Дооронбек Садырбаевдин карындашы.

@politklinika


Экология министрлиги уранды казууга уруксат бере турган мыйзам долбоорун талкууга чыгарды

Документ Бардык ченемдик укуктук актылардын долбоорлорун талкуулоочу бирдиктүү порталга (koomtalkuu.gov.kg) чыгарылды.

Долбоордо 2019-жылы кабыл алынган «Кыргыз Республикасында уран, торий кендерин издөө, чалгындоо жана иштетүү максатында жер казынасын геологиялык изилдөө менен байланышкан ишке тыюу салуу жөнүндө» мыйзамды жокко чыгаруу сунушталат. Мындан сырткары «Жер казынасы жөнүндө» мыйзамга өзгөртүү киргизүүнү камтыйт.

Президент Садыр Жапаров 19-февралда Балыкчы шаарында Ысык-Көлдүн Тоң районунун жана Нарын облусунун Кочкор районунун тургундары менен жолугушуп, Кызыл-Омпол кенин мамлекет иштетүүнү пландап жатканын айткан. Мамлекет башчы кен иштей баштаса, миңден ашуун жумушчу оруну түзүлөрүн билдирген.

@politklinika


‼️Депутат Түмөнбаев Сооронбай Жээнбековду экс-президенттик макамдан ажыратуу демилгесин көтөрдү

-Элдин ырыскысын, элдин байлыгын жеп келген Райым миллион, Райымбек Матраимов деп, арабызда табакташ болгон, жандап жүргөн деген 2-3 депутат кетти, дагы кетиребиз деп аракет болууда, өкмөттөн министрлер кетип жатат. Бирок ошолордун арасында аты аталбай, унутулуп калган, Райым Матраимовду саясий аренага алып келип, партия түзүп берген кишилерибиз Кыргыз мамлекетинин төрүндө, мамлекеттин эсебинен жашап, мамлекеттин акчасын алып жүрөт. Ал ким? Ал- Сооронбай Жээнбеков, -деди Акылбек Түмөнбаев.  

Сооронбай Жээнбеков 2017-2020-жылдары президент болгон. 2020-жылы Октябрь окуясынан кийин кызматтан кеткен.

@politklinika


Европарламент Украинага 50 млрд евро бөлөт

Европарламент төрт жыл аралыгында Украинага 50 миллиард евро өлчөмүндө жардам көрсөтүү үчүн добуш берди. Мыйзамды 536 депутат колдоп, 40ы каршы, 39у калыс болду.

Европарламенттин сайтында жарыяланган билдирүүдө Евробиримдик Украинаны зарыл болгонго чейин колдой турганы айтылат.

ЕБнын лидерлери 1-февралдагы жолугушууда Венгриянын узак мөөнөттүү каршылыгын жеңип, Киевге макрофинансылык жардам бөлүүгө макулдашкан.

Еврокомиссиянын төрайымы Урсула фон дер Лейен 24-февралда Киевге болгон иш сапары учурунда жардамдын биринчи траншы март айында жөнөтүлөрүн кабарлаган. Суммасы канча экени айтылган эмес.

@politklinika


Бишкек шаар соту «24.kg» агенттигине кылмыш ишин ачыктоого тыюу салды

Бишкек шаар соту «24.kg» маалымат агенттигинин кылмыш иши боюнча маалыматтарды ачык жарыялоого тыюу салган тергөөчүнүн аракетин жокко чыгаруу боюнча апелляциялык доо арызын карады.

Маалымат агенттиги кабарлагандай, шаардык сот райондук соттун чечимин күчүндө калтырды.

Адвокат Нурбек Сыдыковдун сөзүнө караганда, «24.kg» агенттигинин жетекчилиги тергөөчүнүн басылмага карата козголгон кылмыш иши тууралуу маалыматтарды ачыкка чыгарбоо тууралуу кол койдурганы мыйзамсыз деп эсептешет.

Адвокаттын маалымдашынча, соттун чечими эмнеге негизделгени азырынча белгисиз.

@politklinika


Алмазбек Атамбаев Испаниянын өкмөт башчысы менен жолугушту

Бул тууралуу Социал-демократтар партиясынын лидери Темирлан Султанбеков Фейсбуктагы баракчасына жазып чыкты.

Эске салсак, былтыр 14-февралда мурдагы президент Алмазбек Атамбаев абактан чыккан. Жогорку Сот Алмазбек Атамбаевдин Азиз Батукаевдин бошотулушуна байланыштуу кылмыш иши боюнча өкүмүн жокко чыгарган. Алмазбек Атамбаевге дарылануу үчүн Кыргызстандан чыгууга уруксат берилген.

@politklinika


Жаңы туу түшүрүлгөн паспорттор апрелден баштап берилет

Жаңы туу түшүрүлгөн паспорттор апрелден баштап берилет. Бул тууралуу бүгүн, 27-февралда Жогорку Кеңештин Транспорт, коммуникациялар, архитектура жана курулуш комитетинин жыйынында Калкты каттоо департаментинин башчысы Арсен Миңбаев билдирди.

«Негизи туунун өзгөрүшү менен документтерди толук алмаштыруу талабы жок. Азыр жарандардын колундагы паспорттор мөөнөтү бүткүчө иштейт. Ал эми план боюнча бизде жаңы туу түшүрүлгөн ички паспорттор апрелдин ортосунан тартып, берилет. Жалпы жарандык паспортту келерки 2025-жылдан тартып бере баштайбыз», — дейт ал.

Мамлекеттик тууну алмаштыруу мыйзам долбоору былтыр жылдын аягында Жогорку Кеңеш тарабынан кабыл алынган. Ага өткөн жылдын 22-декабрында президент кол койгон.

@politklinika


Бишкектен жана Оштон Ташкентке түз аба каттамдары ачылды

Бул тууралуу «Манас» эл аралык аэропортунун басма сөз кызматынан билдиришти.

Маалыматка ылайык, Кыргызстандын «Tez Jet» авиакомпаниясы «Манас» жана «Ош» эл аралык аэропортторунан Өзбекстанга туруктуу каттамдарды аткарууга уруксат алып, Бишкек жана Ош шаарларынан Өзбекстанга туруктуу каттамдардын санын көбөйтүүдө.

Каттамдар RJ-85 жана MD-83 учактары менен Ош — Ташкент — Ош жана Бишкек — Ташкент — Бишкек багыттары боюнча аткарылат.

@politklinika


#Фактчекинг: “Отуруш дегенди биринчи болуп апалар башташат. Эркектер тамактануучу жайларга кирип, чай иче албай калдык деп жатышат. Кирсе эле 99% шагыраган аялдар. Үйдө өткөргүлө. Келин дегенди эмнеге алдыңар эле. Ошол жуусун, тамак жасап берсин…”

Социалдык тармактарда дал ушул сөздөрдү айымдар топтолгон жерде айтып жаткан аялдын видеосу тарады.

Аялдардын коомдук тамактануучу жайларда отуруусуна чектөө барбы? Жынысына карап, көчөгө чыгууга тыюу салуу канчалык деңгээлде туура? Мыйзам бул тууралуу эмне дейт? “ПолитКлиника” медиасы текшерип көрдү 👇👇👇

https://pk.kg/news/inner/ayaldar-jd-n-chykpaj-konok-tossun-ayaldardyn-koomduk-zhajlarga-chyguusun-chekt-bash-myjzamga-karshy-kelet/


Сот Камчыбек Жолдошбаевди камакка алуу чечимин чыгарды

Бишкек шаарынын Биринчи май райондук соту экс-депутат, “Беш-Сары” жоопкерчилиги чектелген коомдун негиздөөчүсү Камчыбек Жолдошбаевди 19-апрелге чейин камакка алуу чечимин чыгарды.

Бул тууралуу райондук соттун басма сөз кызматы билдирди.

«Беш-Сары» ЖЧКсынын негиздөөчүсү салык төлөөдөн качууга жана алдамчылыкка шектелип кармалганын Улуттук коопсуздук мамлекеттик комитети (УКМК) тарабынан 21-февралда кармалган.

«Жүргүзүлгөн ыкчам-иликтөө иш-чараларынын натыйжасында жетекчиликтин көрсөтмөсү менен «Беш-Сары» ЖЧКсынын администрациясы көп жылдардан бери кош бухгалтердик эсепке алуу иштерин жүргүзүп келгени аныкталган.

@politklinika


Зеленский согушта 31 миңден ашуун украин аскери каза болгонун билдирди

Украинанын президенти Владимир Зеленский жекшембиде Киевде басма сөз жыйынын өткөрүп, биринчи жолу украин куралдуу күчтөрү канча аскеринен ажыраганын айтты. Ал 2022-жылдын 24-февралында башталган согушта 31 миңден ашуун украин аскери өлгөнүн билдирди.

«Бул согушта 31 миң жоокер курман болду. Путин жана анын чөйрөсү айткандай, 300 миң эмес, 150 миң эмес. Ошентсе да бул жоготуулардын ар бири биз үчүн чоң жоготуу” деди Зеленский.

Ал орус күчтөрү басып киргенден бери Украинада он миңдеген жайкын тургундун өмүрү кыйылганын белгилеп, Орусия 180 миң аскеринен ажыраганын, 500 миңдей орус жоокери жарадар болгонун кошумчалады.

@politklinika


АКШ кыргызстандык дагы бир компанияга санкция салды

23-февралда АКШ Орусияга каршы санкциялардын жаңы айлампасын киргизди. 500дөн ашык жеке жана юридикалык жактарды камтыган санкциялык тизмеге кыргызстандык «Укон» ЖЧКсы (UCON COMPANY) дагы кирген.

Бул компанияга карата экинчи даражадагы чектөөлөр «Орусиянын аскердик-өнөр жай базасын колдоого багытталган экономика тармагындагы ишмердиги» үчүн киргизилгени айтылат.

Юстиция министрлигинин базасындагы маалыматка ылайык, «Укон» чет өлкөлүк катышуучу бар компания. Ал 2022-жылы августта каттоодон өткөн. ЖЧК адистештирилбеген дүң соода менен алектенери көрсөтүлгөн.

@politklinika




Байден Навальныйдын өлүмү үчүн Путинге каршы санкция киргизерин билдирди

Бул тууралуу CNN телеканалы кабарлады.

Байден оппозициялык саясатчынын өлүмүнө Путин жооптуу экенин белгиледи. Америка президенти мындай билдирүүнү Навальныйдын жесири Юлия жана кызы Дарья менен жолуккандан кийин жасады.

«Мен анын аялы жана кызы менен жолугуп, анын (Навальныйдын) укмуштай кайраттуу адам экенин ачык айтуу сыймыгына ээ болдум» деди Байден.

Буга чейин мамлекеттик катчынын саясий маселелер боюнча орун басары Виктория Нуланд АКШ Орусияга каршы санкциялардын «кыйратуучу» пакетин даярдап жатканын билдирген. Ал жаңы санкциялар дыкат даярдаларын жана орус тараптын аларды буйтап өтүшүнө жол берилбестигин белгилеген.

@politklinika



Показано 20 последних публикаций.